အိပ်မပျော်ခြင်းအတွက် ဖြည့်စွက်အာဟာရ မယ်လတိုနင် (Melatonin)
အိပ်မပျော်ခြင်း သက်သာစေဖို့ ဖြည့်စွက်အာဟာရအနေနဲ့ မှီဝဲကြတဲ့ မယ်လတိုနင်အကြောင်း မျှဝေပေးလိုက်ပါတယ်။
အိပ်မပျော်ခြင်းအတွက် ဖြည့်စွက်အာဟာရမယ်လတိုနင် (Melatonin)
အခုကာလမှာ ကိုဗစ်ရောဂါအပါအဝင် လူမှုရေး/စီးပွားရေးအဆင်မပြေမှု၊ ဘဝနေရေး မလုံခြုံမှု စတာတွေကြောင့် တချို့လူတွေဟာ ညဘက် အိပ်မပျော်ကြဘူးလို့ ဆိုကြပါတယ်။ ဒါကြောင့် အိပ်မပျော်ခြင်း သက်သာစေဖို့ ဖြည့်စွက်အာဟာရအနေနဲ့ မှီဝဲကြတဲ့ မယ်လတိုနင်အကြောင်း မျှဝေပေးလိုက်ပါတယ်။
------------------------
မယ်လတိုနင်ဆိုတာ . . .
------------------------
မယ်လတိုနင်ဆိုတာ ဦးနှောက်ထဲရှိ ပိုင်နီရယ်ဂလင်းကနေ ထုတ်ပေးနေတဲ့ ဟော်မုန်းတစ်မျိုးပါ။ ခန္ဓာကိုယ်ရဲ့ အိပ်-နိုးစနစ်ကို ထိန်းချုပ်ပေးတဲ့ ဟော်မုန်းဖြစ်ပြီး ညဆို အိပ်ပျော်အောင်၊ နေ့ဆိုနိုးလာအောင် အချက်ပြပေးပါတယ်။ ဆဲလ်တွေထဲက ဖရီးရယ်ဒီကယ်တွေကိုတွန်းဖယ်ပေးတဲ့ အစွမ်းထက် အင်တီအောက်ဆီးဒင့်တစ်မျိုးဖြစ်တာကြောင့် အိုမင်းမှုကို ဟန့်တားပေးသလို ကင်ဆာမဖြစ်အောင် ကာကွယ်ပေးနိုင်စွမ်း ရှိပါတယ်။ ဟော်မုန်းလုပ်ငန်းဆောင်တာအများစုရဲ့ကြားခံအနေနဲ့ ဆောင်ရွက်ပြီး ကိုယ်ခံအားစနစ်ကျန်းမာဖို့နဲ့ ဗိုင်းရပ်စ်တွေမဝင်ဖို့ ကာကွယ်ထိန်းသိမ်းပေးပါတယ်။ အသက်ကြီးလာချိန်မှာ မယ်လတိုနင်ဟော်မုန်းထွက်ရှိမှုက လျော့ကျလာပါတယ်။
.png)
------------------------------------------------
မယ်လတိုနင်ဆေးကို ဘယ်သူတွေ သောက်နိုင်သလဲ
------------------------------------------------
နှစ်နှစ်ခြိုက်ခြိုက် အိပ်မပျော်သူများ၊
အိပ်ရမယ့်အချိန်မျိုးမှာ အိပ်မရသူများ၊
Jet Lag ခေါ်တဲ့ အချိန်နာရီမတူတဲ့ ဒေသတစ်ခုနဲ့ တစ်ခုကို လေယာဉ်နဲ့ အဝေးကြီး ခရီးသွားရလို့ အိပ်ချိန် မမှန်သူများ၊
နေ့ဆိုင်း၊ ညဆိုင်းအလုပ်လုပ်ရလို့ ကိုယ်အိပ်ရမယ့်အချိန်မှာ အိပ်မပျော်နိုင်သူများ၊
ရာသီဥတုကြောင့် စိတ်ကျဝေဒနာခံစားရသူများ၊
စိုးရိမ်သောကများပြီး အိပ်မပျော်နိုင်သူများ သောက်နိုင်ပါတယ်။
------------------------------------------------
ဘယ်လောက်ပမာဏသောက်နိုင်သလဲ
------------------------------------------------
တစ်နေ့မှာ ၂ မီလီဂရမ်မှ ၃ မီလီဂရမ်အထိ သောက်နိုင်ပါတယ်။ မယ်လ်တိုနင်ဆေး သောက်သုံးပြီး တစ်ပတ်-နှစ်ပတ်ကြာမှသာ (လိုအပ်ပါက) ဆေးပမာဏတိုးပြီး ၆ မီလီဂရမ်အထိ သောက်နိုင်ပါတယ်။
------------------------------------
ဆေးကို ဘယ်အချိန် သောက်သင့်သလဲ
--------------------------------- - -
မအိပ်ခင် မိနစ် ၃၀-၉၀ စောပြီး သောက်ထားရင် အိပ်ချင်စိတ်ဖြစ်လာစေပါတယ်။ သောက်ပြီး မီးအမှောင်ချ၊ အိပ်ရာထဲဝင်အိပ်ပေးရင် ပိုပြီး ကောင်းကောင်း အိပ်မောကျစေပါတယ်။
-----------------------------------------
ဆေးစွဲလမ်းမှု ဖြစ်စေနိုင်သလား
-----------------------------------------
လေ့လာမှုအရ စွဲလမ်းမှုမဖြစ်စေဘူးလို့ သိရပါတယ်။ မယ်လတိုနင်ဖြည့်စွက်အာဟာရက ရေတိုအတွက် စိတ်ချရပေမယ့် ရေရှည်အတွက်တော့ မပြောနိုင်သေးဘူးလို့လည်း ဆိုထားပါတယ်။ အကောင်းဆုံးက အိပ်ချိန်ပြန်မှန်လာရင် ဆေးရပ်လိုက်ဖို့ပါပဲ။
-----------------------
ဘေးထွက်ဆိုးကျိုး
-----------------------
ပုံမှန်ပမာဏမှီဝဲသူတွေမှာ အများအားဖြင့် ဘေးထွက်ဆိုးကျိုး ကြီးကြီးမားမား မရှိပါ။ ဆေးပမာဏ များသွားရင်တော့ မူးဝေတာ၊ နေ့ဘက်မှာ အိပ်ချင်တာ၊ ခေါင်းကိုက်တာ၊ ပျို့ချင်တာ၊ အဆစ်အမျက် နာကျင်ကိုက်ခဲတာ စတာတွေကို ဖြစ်စေနိုင်ပါတယ်။
----------------------------------
ဘယ်သူတွေ မသောက်သင့်ဘူးလဲ
----------------------------------
ကလေးငယ်တွေ၊ အပြင်းစား စိတ်ကျရောဂါ ခံစားနေရသူ၊ အတက်ရောဂါရှိသူ၊ အသည်းရောဂါရှိသူ၊ ကျောက်ကပ်ဆေးနေရသူ၊ သွေးလေးဖက်နာ ရောဂါရှိသူ၊ ကိုယ်တွင်းအင်္ဂါအစားထိုးလဲ လှယ်ထားသူ၊ ကိုယ်ခံအားချိုးနှိမ်ဆေး မှီဝဲနေရသူ၊ ကိုယ်ဝန်ဆောင်နဲ့ နို့တိုက်မိခင်တွေ မသောက်သင့်ပါဘူး။
----------------------------------------------
မယ်လတိုနင်ဆေးနဲ့ ဓာတ်ပြုနိုင်ခြေရှိတဲ့ ဆေးများ
----------------------------------------------
သွေးခဲဆေး၊ အတက်ကျဆေး၊ ကိုယ်ဝန်တားဆေး၊ ဆီးချိုရောဂါကုသဆေးများ၊ ကိုယ်ခံအားနှိမ်ဆေးတွေနဲ့ ဓာတ်ပြုနိုင်ပါတယ်။
------------------------
အိပ်ရေးဝ၀ အိပ်မောကျစေဖို့
------------------------
အိပ်ရေးဝ၀ အိပ်ပျော်တာက ကိုယ်ခံအားကို ကောင်းစေတဲ့အတွက် နှစ်နှစ်ခြိုက်ခြိုက် အိပ်မောကျဖို့ အရေးကြီးပါတယ်။ နံနက်ခင်းမှာ နေခြည်နုနုခံယူခြင်း၊ နေ့ခင်းမှာ အကြာကြီး မအိပ်ခြင်း၊ ကဖင်းဓာတ်ပါတဲ့ ကော်ဖီ၊ လက်ဖက်ရည်၊ ကိုလာတို့ကို ညနေဘက် မသောက်ခြင်း၊ အိပ်ရာဝင်ခါနီး အကြောလျှော့ခြင်း စတာတွေကိုလည်း လိုက်နာပေးဖို့လည်း အကြံပေးပါရစေ။
Credit: -----၊ ဇွန်ခိုင်ဦး (ဆေးဝါးတက္ကသိုလ်) ၊-----
No comments yet. Start a new discussion.