ဗီတာမင်ဒီ
ဗီတာမင်ဒီက သင့်ကျန်းမာရေးအတွက် လိုအပ်တဲ့ အာဟာရဓာတ် တစ်မျိုးပါ။ ခန္ဓာကိုယ် ကျန်းမာကြံ့ခိုင်စွာရှိနေဖို့အတွက် ဗီတာမင်ဒီ ပြည့်ပြည့်ဝ၀ ရှိဖို့ အရေးကြီးပါတယ်။
ဗီတာမင်ဒီ
---၊ ဇွန်ခိုင်ဦး (ဆေးဝါးတက္ကသိုလ်) ၊---
ဗီတာမင်ဒီက သင့်ကျန်းမာရေးအတွက် လိုအပ်တဲ့ အာဟာရဓာတ် တစ်မျိုးပါ။ ခန္ဓာကိုယ် ကျန်းမာကြံ့ခိုင်စွာရှိနေဖို့အတွက် ဗီတာမင်ဒီ ပြည့်ပြည့်ဝ၀ ရှိဖို့ အရေးကြီးပါတယ်။
ဗီတာမင်ဒီအကြောင်း
----------------------------
ဗီတာမင်ဒီက အဆီမှာ ပျော်ဝင်တဲ့ ဗီတာမင် (Fat Soluble Vitamin)တစ်မျိုးပါ။လူ့အရေပြားအောက်မှာရှိတဲ့ ကိုလက်စထရောအဆီဓာတ်ကို နေရောင်ခြည်ကျရောက်တဲ့အခါ ဗီတာမင်ဒီ အဖြစ် ပြောင်းလဲပေးပါတယ်။ သာမန်လူတစ်ယောက်က နေ့စဉ် နံနက်ခင်းနေခြည်နုနုအောက်မှာ အချိန် ၁၀မိနစ်~ ၃၀မိနစ်ခန့် နေလိုက်ရင် ပုံမှန်လိုအပ်တဲ့ ဗီတာမင်ဒီဓာတ်ကို ရရှိစေပါတယ်။
ဗီတာမင်ဒီက ဘာကောင်းကျိုးရှိသလဲ
---------------------------------------------------
ဗီတာမင်ဒီက ကယ်လ်စီယမ်နဲ့ ဖော့စ်ဖရပ် သတ္တုဓာတ်တွေ ခန္ဓာကိုယ်ထဲမှာ ရရှိစေဖို့ လုပ်ဆောင်ပေးတဲ့နည်းနဲ့ အရိုးသန်စွမ်းစေပါတယ်။
ဗီတာမင်ဒီက နှလုံးနဲ့ သွေးကြောကျန်းမာစေပါတယ်။
စိတ်ကျရောဂါဝေဒနာလက္ခဏာတွေကိုလည်း သက်သာစေပါတယ်။
ဗီတာမင်ဒီက သွေးတွင်း သကြားဓာတ်ကို ထိန်းပေးတယ်လို့ လေ့လာမှုတချို့အရ သိရပါတယ်။
ဗီတာမင်ဒီက ကိုယ်ခံစွမ်းအား ကောင်းမွန်စေဖို့လည်း လုပ်ဆောင်ပေးပါတယ်။ ကိုယ်ခံစွမ်းအားစနစ်က ဘက်တီရီးယားနဲ့ ဗိုင်းရပ်စ်တွေကို တွန်းလှန်နိုင်ဖို့ ဗီတာမင်ဒီကို လိုအပ်တဲ့အတွက် နေ့စဉ် ဗီတာမင်ဒီ ပုံမှန်ရဖို့ မလွယ်ရင်/ချို့တဲ့ရင် တစ်နေ့တာ လိုအပ်တဲ့ သတ်မှတ်ပမာဏအတိုင်း ဖြည့်စွက်သောက်သုံးနိုင်ပါတယ်။
တစ်နေ့တာ လိုအပ်သည့် ဗီတာမင်ဒီပမာဏ
--------------------------------------------------------
အသက်အရွယ်နဲ့ နေရာဒေသပေါ် မူတည် ပြီး တစ်နေ့တာ လိုအပ်တဲ့ ပမာဏက မတူပါဘူး။
မွေးကင်းစမှ ၁၂ လအထိ-10 mcg (400 IU)
၁နှစ်မှ ၇၀ နှစ်အထိ-15 mcg (600 IU)
၇၁နှစ်နှင့်အထက်-20 mcg (800 IU)
ကိုယ်ဝန်ဆောင်နဲ့ နို့တိုက်မိခင်-15 mcg (600 IU)
(Ref;https://ods.od.nih.gov/fact-sheets)
သောက်လို့ရတဲ့ ဗီတာမင် ဒီနှစ်မျိုးကို ဘယ်ကနေ ရနိုင်သလဲ
--------------------------------------------------------
ဗီတာမင်ဒီမှာ D2 နဲ့ D3ဆိုပြီး သောက်သုံးလို့ရတဲ့ ဗီတာမင်ဒီ အမျိုးအစား ၂မျိုး ရှိပါတယ်။
ဗီတာမင် D2 ကို အပင်ထွက်အစာ၊ ဒိန်ခဲနဲ့ မှိုအမျိုးအစားတချို့ကနေ ရရှိနိုင် ပါတယ်။
ဗီတာမင် D3ကို အဆီများတဲ့ ငါး (ဥပမာ- ဆယ်လ်မွန်၊ တူနာ၊ မက်ကရယ်)၊ အမဲသားလို အနီရောင်အသား၊ အမဲအသည်း၊ ဥအနှစ်တွေကနေ ရရှိနိုင်ပါတယ်။
ဗီတာမင်ဒီချို့တဲ့ရင် ဘယ်လိုလက္ခဏာတွေ တွေ့ရတတ်သလဲ
--------------------------------------------------------
ဗီတာမင်ဒီချို့တဲ့တဲ့အခါ-
မကြာခဏ အအေးမိ၊ဖျားနာတတ်ပါတယ်။
ပင်ပန်းနွမ်းနယ်တတ်ပါတယ်။
ခါး၊အရိုးနဲ့ ကြွက်သား ကိုက်ခဲတတ်ပါတယ်။
အရိုးကျိုးလွယ်ပါတယ်။
စိတ်ဓာတ်ကျတတ်ပါတယ်။
အနာကျက်နှေးစေနိုင်ပါတယ်။
ကလေးတွေမှာ အရိုးပျော့ရောဂါဖြစ်တတ်ပါတယ်။
ကိုယ့်မှာ ဗီတာမင်ဒီချို့တဲ့မှုရှိ၊ မရှိ သွေးစစ်ဆေးကြည့်သင့်ပါတယ်။ (သွေးစစ်ဆေးလို့ ဗီတာမင်ဒီ ချို့ တဲ့နေရင် ဖြည့်စွက်အားဆေးကို မှီဝဲသင့်ပါတယ်။)
ဗီတာမင်ဒီကို ဘယ်သူတွေ မှီဝဲသင့်သလဲ
--------------------------------------------------------
နေ့စဉ် နေရောင်ခြည် မရဘဲ/မထိဘဲ နေသူများ (ဥပမာ-အိမ်ထဲမှာပဲ နေသူများ၊ ညဆိုင်းအလုပ်လုပ်သူများ၊ အီကွေတာနဲ့ဝေးရာမှာ နေသူများ)
ဗီတာမင်ဒီပါတဲ့ အစာမစားသူများ၊
ဗီတာမင်ဒီနည်းတဲ့ နို့တိုက်မိခင်တွေနဲ့ သူတိုရဲ့ နို့စို့အရွယ်ကလေးငယ်များ၊
နေရောင်ခြည်ကနေ ဗီတာမင်ဒီထုတ်လုပ်နိုင်စွမ်းနည်းတဲ့ အသားအရောင်ရင့်သူများ၊
အဆီစုပ်ယူမှုမကောင်းတဲ့ ရောဂါရှိသူများ (ဥပမာ-အူရောင်ရမ်းတဲ့ ရောဂါရှိသူများ)
အဝလွန်သူများ၊
အိမ်ထဲမှာပဲ အမြဲ နေထိုင်တတ်သူများ၊
ငါး၊ နို့ မစားသောက်သူများ
ဗီတာမင်ဒီလွန်ကဲတဲ့ပမာဏကို ရေရှည်စွဲသောက်ရင် ဘာဖြစ်တတ်သလဲ
--------------------------------------------------------
သွေးထဲမှာ ဗီတာမင်ဒီပမာဏ အလွန်များရင် (375 nmol/L or 150 ng/mLထက်ပိုများရင်) ပျို့ချင်အန်ချင်စိတ်ဖြစ်ပေါ်ခြင်း၊ အန်ခြင်း၊ ရင်ပြည့် ရင်ကယ်ဖြစ်ခြင်း၊ နုံးချည့်ခြင်း၊ အစားအသောက် ပျက်ခြင်း၊ ဆီးသွားများခြင်း၊ ရေငတ်ခြင်းနဲ့ ဆီး ကျောက်တည်ခြင်းတို့ ဖြစ်နိုင်ပါတယ်။
သွေးထဲမှာ ဗီတာမင်ဒီက အလွန်အမင်းများရင် ကျောက်ကပ်ထိခိုက်ခြင်း၊ နှလုံးခုန်မမှန်ခြင်းတွေအထိ ဖြစ်စေနိုင်ပါတယ်။
#ဒါကြောင့် ဗီတာမင်ဒီအားဆေးကို ရေရှည်စွဲမှီဝဲနေသူတွေအနေနဲ့ ၃လတစ်ခါ သွေးစစ်ဆေးကြည့်ဖို့ အကြံပေးပါရစေ။
သတိပြုရန်
------------------
ဗီတာမင်ဒီကို မာလ်တီဗီတာမင်အားဆေးထဲမှာတွေ့ရတတ်သလို သီးသန့်တစ်မျိုးတည်းလည်း ရနိုင်ပါတယ်။ ဗီတာမင်ဒီကို အစာစားပြီးချိန် မှီဝဲရင် စုပ်ယူမှုအကောင်းဆုံးဖြစ်ပါတယ်။
No comments yet. Start a new discussion.